FAHAMU KUHUSU JOKOFU LA ASILI

Ilikuwa ni mwaka 2013 katika maonesho ya nane nane mkoani Dodoma (Nzuguni)  kwenye banda la Jeshi la Kujenga Taifa (JKT) ambapo nilibahatika kuona kitu kipya katika macho yangu. 

Wakulima wengi katika nchi yetu huwa wanalalamikia miundo mbinu, lakini wana sahau kuwa wao wenyewe wanatakiwa kuwa wabunifu wa mambo mengi badala ya kulaumu na kulalamikia vitu ambavyo wakikaa na kutafakari wanaweza kucheka wenyewe.

Katika mada yangu leo naandika juu ya jokofu la asili ambalo linatengenezwa kwa kutumia miti, mkaa, nyasi, na wavu.  Ni banda ambalo linaweza kuhifadhi mazao mabichi kwa muda wa majuma mawili hadi mwezi mmoja wakati wakiendelea kutafuta masoko.  Hakuna wadudu, pia mazao hayanyauki wala kupoteza ladha yake.

Ndani ya banda hilo kunakuwa na ubaridi mwingi tu wa kutosha kuhifadhi matunda, mbogamboga pamoja na vyakula vilivyo fresh kutoka shamba.

Ni kibanda kilichojengwa kwa nguzo za miti na kuwekwa wavu wa kawaida tu.  Kisha katikati ya kuta za wavu, ukajazwa mkaa huu wa kawaida utumikao kwa kupikia majumbani kwetu.  Huu mkaa unalowanishwa kwa maji kila siku au kama maji ni ya shida baada ya siku moja.  Mkulima ukiwa na banda hili huna hofu ya kuharibikiwa na mazao kwa muda wa mwezi mmoja wakati ukifanya mauzo yako au kutafuta masoko.  Kwa kuwa hatuna kasumba ya kuandika mradi kabla ya kulima, na hata kama utakuwa na andiko la mradi basi banda hili ni moja ya vitendea kazi utakavyotakiwa kuwa navyo.  Wafugaji na wakulima tuwe watafiti na wabunifu wa shughuli zetu.  Pendelea kujiunga na vikundi kama mfumata ili uweze kupata mawazo mapya.